|
یاشماق طرفیندن
یاری ظارافات یاری جدّی
یاشاسین بیزدن آرتیق داریخانلار...
اصلینده هر بیر یازییا جواب وئرمهیی دوزگون حساب ائتمیریک. هر کیم اؤز مالیخولیاسیندا هر کسه تهمت وورا بیلر، سونوجونو دوشونمورسه ده!
بیر چوخ دوستلار بو یازینین یایینلانماماسینی ایستهمیشلر آمما منه ائله گلیر کی بعضی تهمتلر اؤنجهدن طراحی اولونموش و دستورلار آلمیش اولا بیلر ده. اونا گؤره ده بو یازینی گؤیلوموز ایستهمهدن یاییماغا مجبور اولوروق. بو یازی بیر شخصه جاواب اولماسا دا (چون حقیر انسانلار اونو- بونو یامانلاماقلا بؤیویرلر) آچیق فیکیرلی اوخوجولارین نظر دقّتینه یازیلمیشدیر.
سایین سورگون نه یازیبسا بیر یاندا قالسین، آمما بیر شئی بیزی تعجوبلندیریر، بو دوستوموز، بو قدر های-کوی سالماغین یئرینه نییه گئدیب پینار انتشاراتی ایله حساب کیتاب ائلهمیر. آخی چوخدان بیز بو آغانین حسابینی اونلارا وئرمیشیک. اصلینده قانوناً نشر ائدن و پخش ائدن پینار یایین ائویدیر.
سایین بهرام محمدعلی قشلاقی (سورگون) حضرتلری!
گؤزل یازینیزی اوخودوق، یاشامالیسان...
و امّا بعد:
سیزین «قرنفیل اوچ گول آچار» کیتابی (سهند یالچین – آرزو مختاری و بهرام سورگون) هره نیزدن بئش آلتی شعر گئدن 58 صحیفهلیک مجموعهنین شاعیرلری سیزسینیز، اینانمایانا لعنت!
و او کیتابا دا پینار انتشاراتی مجوز آلیب و اونون الییله نشره یئتیریلیب و البته کی اونون کتابسازی (ائدیت صفحه آرایی و گرافیکینی) بیز (یاشماق) گؤرموشدور.
چاپ و گرافیکی ایشی 600 مین تومن اولان مین تیراژلی (986 جیلد) کیتابینیزین، اون بئش فایز نشر حقینی پینار گؤتورندن سونرا 500 جیلدینی سیزه گؤندریب، 250 جیلدینی اؤزو یاییب و ساتاندان سونرا طبیعی کی پولونو سیزه اؤدهمهلیدیر. و اونون 80 جیلدینی یاشماق طرفیندن تهرانداکی کیتاب ائولرینه ساتیش اوچون وئرمیشدیر. همن کیتابین 50 جیلدی فرزانه جنابلارینا وئریلمیش و اونلار دا بو ایلین خرداد آییندا هامیسینی، ساتیشی اولمادیغی اوچون قایتارمیشدیر و بو مسئلهنی تهرانادا قورولان کیتاب نمایشگاهیندا سیزینله دانیشدیق و حتی فرزانه جنابلاریندان دا سوروشا بیلرسینیز. و بیر نئچه جیلدی ده باشقا کیتاب ساتیش ائولرینه وئریلمیشدی کی قایتاریلمیش و دانیشدیغیمیز اساسدا سیزه قایتاریلاجاقدی. البته کی اؤزونوز اوّل گونلر دئمیشدیز کی بو کیتابلاردان بیر سیرا اوستادلار و آدلیم یازارلارا هدیه اولاراق وئرین و بیز ده یاشماق کیتابلارینین کناریندا ایگیرمی یه یاخین کیتابی بیر سیرا آدلیم عالیملره پای وئردیک و اونلارین لیستینی سنه نمایشگاهدا دئدیک. البته کی اونون دا پولونو بیز اؤدهیه بیلریک. سیزین کیتابی هئچ کیم اؤزونه ساتا بیلمز، بئله های هشیر سالمالارینیزی قاباقجادان شهرینیزده کی دوستلاریز (ایکی ساعات فورمالیته توتولما جریانینیزدا) دئمیشدیلر بیزه. و بیز بیلیردیک، ایلان اودوب اژدها چیخاجاقسینیز اوردان و سیزه تاپشیراجاغی ایشلری دقیق یئرینه یئتیرهجکسینیز، سایین سابقاً شاعیر! حضرتلری... نه ایسه سیزین کیتابین بیر آزی بیزده حل اولونمالیدی کی اولوب و قالانینی پینارلا حل ائدین لطفاً...
او کی قالدی بو کیتابدا کیمین آدی گئدیب، طبیعی کی سیزین اوچوزون آدینیز گئدیب، لطفا بیر ده کیتابا باخین. بیزیم آدیمیز کیتابی حاضیرلایان کیمی و سیزین اجرایی کارمندلریز و یا تبریزلی شاعیر و گؤزل مغنّی دوستوموز دئمیشکن (فرهنگی حامبال) کیمی گئتمیشدیر. قورخمایین شعرلرینیزی اوغورلاماریق واللاه... بو سیزین دئدییینیز آلتی یوز مینلیک کیتابینیز. بیر ده ماراقلیدی کی بیز چوخداندی یاشماغی نشر ائتمیریک، نه جور سیزین پولونوزلا یاشماق مجلهسینی چیخارتدیق!!!
.........................................................................................
یاشماق طرفیندن سیزه 86 و87-جی ایلدن ساتیش اوچون کیتاب گؤندریلیب کی سیز سؤز وئرمیشدینیز، دَیرینی هر آلتی آیدا گؤندرهجکسینیز، بو حسابی 88-جی ایلین قیشیندا 400 مین اؤده دینیز. و 300 مین سهراب طاهرین چیخماسینا پول وئردیز کی دَیری قدر سیزه کیتاب گؤندریلسین و بیز ده چاپدان سونرا سیزه هم سهراب طاهر هم ده بختیار واهابزاده و باشقا اثرلردن گؤندردیک و حتی تئلفوندا امر بویوردونوز کی «قوشاچایدا کیتاب نمایشگاهی وار، یاخشی ساتیش وار اوردا، (انتشارات دنیای نو)دان کوراوغلو کیتابی و cd سی، بایاتی بایات اولماز، جمیله و چنگیز آیتماتوون باشقا اثرلرینی و غیره ... آلیب و پیناردان «اورال آلتاییک و سومر» سؤزلوگو و بیر سیرا کیتابلار آلیب گؤندرک» کی سیزین امرینیز اجابت اولدو بیر حالدا کی آدی گئدن انتشاراتلار داها سیزه نسیه کیتاب وئرمیردیلر. بیلمیرم نییه...
یئنه او کیتابین (سهراب طاهر) شناسنامهسینده بیز چاپا حاضیرلایان کیمی قید اولموشوق. بیر حالدا کی کیتابین تایپیندان سونرا (کؤچورله کؤچومهسیندن باشقا) هر ایشینی بیز گؤرموشوک (ائدیت، صفحه آرایی، جیلد گرافیکی، چاپ ایشلری ، اجرایی ایشلر و حتی پخش ایشلری...) مجویزینی ده کی پینار زحمتینی چکمیشدی. طبیعی کی حاضیرلایانین آدی تایپیستدن قاباق گئتمهلیدی قارداش!
بیر ده قالدی تایپ ایشی؛ او کی مسلمدی سیزین حاقّّینیزدیر. اونلاری اؤدهمهلییک. (دده قورقود کیتابی و بیر رومان) بیزه تایپ ائدیبسیز کی اونلاری پیناردان گؤندردیک ارشادا. انشاالله کی ادعا ائتمهیهسیز او کیتابلاری دا سیز یازیبسیز چونکو اونلار باکی کیتابلاریدیلار و یازیچیلاری چوخ بؤیوک و حقیقتاً آذربایجان یازیچیلار بیرلییینین عضولریدیرلر..
البته سیز اؤتن ایللرده دال با دال زنگ آچدیز کی سیزه لاتین الفباسیندا چاپ اولموش دَیَرلی ادبیات کیتابلاری گؤندرک و سیز ده تایپ ائدهسیز کی اونلاری سیرا کیتابلار کیمی بیرلیکده چاپ ائدک و بیز ده گؤندردیک (یادیزدا اولسا حمیدله گتیردیک) ایندی بیر سیراسینی اؤز آدیزا چیخیرسیزسا عشق اولسون و بیر سیراسینین تایپ پولونو ایستیرسیزسه او دا عشق اولسون، زنگ آچین یا دا گئدین پینارلا حساب کیتاب ائدین، من دئیهرم هر نه حسابینیز وارسا وئررلر... البته اگر کاریزدا اولماسا او کیتابلارین اصلی سی (اوریژینال لاتین و کریل کیتابلاری) بیزه لازیمدی اونلاری بیزه گئری قایتارین لوطفاً.
آشاغیدا آدلارینی چکدیینیز کیتابلاری دئییرم سایین شاعیر، لیستی یادیزدا اولماسا آشاغیدا و باشقا ظاهری لیست توپلوسوندا و آیشو (آذربایجان یازارلار و شاعیرلر اوجاغی!!!) وئبلاقیندا آدلاری دؤنهلرله چکیلمیشدیر. نه ایسه اونودولموشسا دا عشق اولسون... بیر ده کی اونلاری سیز چاپ ائلهتدیرسَز، نه یاخشی، عشق اولسون. بیزیم هئچ بیر سؤزوموز اولمایاجاق. البته بیلمیرم ایندییه کیمی بیر ایش چاپ ائلهتدیریبسیز یا یوخ! ظنّیمجه چاپ ایشلری ایله کؤهنه دمیر آل وئری و یا ال آراباسیندا یئر آلما – سوغان آل وئری، بیر آز فرقلی اولمالیدی.
بیر ده بیر سیرا بناب شاعیرلری طرفیندن سیز و یا حؤرمتلی شاعیرلر اؤزلری اثرلر گؤندریبسیز کی یازینیزدا دا آد چکمیسینیز. بیر سیرالاری دا بیزیم کیتابلاردیلار کی بویورموشسونوز ایگیرمییه یاخین کیتابینیز بیزیم الیمیزدهدیر. بیرینجی مسئله بودورکی سیزین کیتاب نییه بیزیم الیمیزدهدیر. ایکینجی مسئله، او کیتابلار منیم باکیدان گتیردیییم کیتابلاردیلار. سیز چاپ اوچون تایپ ائتدیز و سونرا منه بیر نئچه کیتابین اصلیسی ایله بیرگه گتیردینیز و امر بویوردونوز کی سیزین کارمندلریز و یا...لریز وزارت ارشادا مجوز اوچون گؤندرسینلر و بیز ده اطاعتِ امر ائلهدیک. (البته بیزده اونلارین لاتین وورد فایلی وار و اونلارین هامیسینی اون دقیقهیه کؤچور نرمافزاری ایله کؤچوره بیلیریک). ایندی بویورورسونوز کی «داها بسدیر»!، بیلمیرم بو سؤزونوزدن نه دئمک ایستیرسیز، بیر آز مشدی عیباد کیمی دانیشین، منیم کیمی بئساواد «تاریخ نادری»چیلر ده باشا دوشسون. کیتاب نمایشگاهیندا دئدیم کی اونلارین نشر و مجوز آلما ایشینی ساخلاشدیریم یا یوخ؟ بویوردونوز کی یوخ! تئزراق اقدام ائدین! و بیر لیست ده یازدیق کی، هانسی کیتاب مشترک چاپ اولسون! هانسی سیزین آدلا چاپ اولسون و بیر ایکیسینه ده مالی سرمایه قویان ناشیر تاپمیشدیم. امر بویوردوز، دئیین کی منیم (یانی سورگون معلیمین) تألیف حاقّی نه قدر اولور، اونو دا وئرسینلر. و ناشیرلر ده بو سؤزدن و سیزین حق تألیفین یوخاری!!! اولماسیندان قاچدیلار کی بالاجا یازیچیلارین (فوکویامادان توتدو، میشل فوکو، مارکز، سالینجر، رامیز روشن، احمد شاملو، اورحان پاموق و...) و بئله-بئله کئچیجیکلرله قرارداد باغلاسینلار. یانلیش دوشونمهسم سیز اونلاری مجوز آلماق اوچون بیزه وئردیز و بو آرادا بعضی دوستلار زنگ آچدیلار کی اونلارین مجویزینه تئز اقدام اولسون و بیز ده اونلاری بیر سیرا فرقلی ناشیرلر طرفیندن ارشادا گؤندرمیشیک، یئنه ده سیز و یا اونلار بویورسانیزسا، هر بیر اثری ارشاددان گئری آلماق امکانی اولار ظنّیمجه. اثر صاحبلری ده راضیدیلرسه اونلاری گئری آلماغا چالیشارام حؤرمتلی (آذربایجان یازارلار و شاعیرلر اوجاغی!!!)نین صدری، شاعیر سورگون بَی...
وورغولاماسی پیس اولمازدی کی، سایین «ایلهان تورک» بو گونلر زنگ آچیب و کیتابینین وئردییمیز ناشیر طرفیندن مجوز آلینماسینا راضیلیگینی و اسرارینی بیلدیرمیشدی. و هابئله سادالادیغینیر کیتابلاردان بیری اولان، چنگیز آیتماتووون جمیلهسینی بیز سایین «سعید نجاری»نین ترجمهسی ایله کئچن ایل بیر باشقا معتبر انتشاراتلا ارشادا گؤندرمیشیک. اشاره ائتمهلییم کی بو اثرین بیر سیرالاری «آفتاب آذربایجان» درگیسینده بو مترجمین آدی ایله چاپ اولموشدور. البته سیزین باکی چاپیندان تایپ ائتدیگینیز اثر باشقا بیر اثردیر کی بیزه وئرمهییبسینیز...
سایین بهرام محمدعلی قشلاقی حضرتلری!!!:
بوتون دئدییینیز حساب کیتاب بیر یئرده و بیر ساعاتین ایچینده حل اولاسیدی. تهران کیتاب نمایشگاهیندا عرض ائلهدیم کی گئت، من بوتون کاغیذ کوغوذلارا باخیم بیر ایکی آیین ایچینده گل حلّ ائدک قورتارسین. و سیز ده پینار نشریاتینا استرس و عصبی حالتده اوردا (نمایشگاهدا) دئمیشدیز کی یاشماق منه پول وئرهجک، اونو وئرجَک سیزین ایکی میلیون بورجونوزون بیر آزینی اؤدهیهرم. و اونلار دا بیزه دئدیلر کی سیزین یانی سورگونون پولونو پینارا وئرک، بلکه بورجونوزدان بیر آزی وئریلمیش اولسون. و بیز ده همن ایشی گؤرموشوک. یئنه گلین باشقا جوره ده حلّ ائدهیین. ولی سیزین کیتابین چوخونون پخش زحمتینی پینار انتشاراتی چکمیشدی، بیر سیراسی دا کی ساتیلماییب گئری قایتاریلمیشدی، البته بعضاً بؤیوک یازار و شاعیرلرین ده اثرلری ائله بوجور اوخوجولار طرفیندن یاخشی قارشیلانمیر، باشی داشلی اوخوجولاردان گیلئیلنمهیین لطفاً. بو حسابلارا گؤره گلین اوردا حسابلاشاق و سیزین حسابی اونلاردان آلیب، سیزه قایتاریم. بیر ده کی یالان اولماسین کئچن بیر آی ایچینده! دال با دال سیزه زنگ آچدیم تئلفونوزو گؤتورمهدینیز. اؤز دئمهگینیزله بیزدن کوسموشدونوز و تئله جاواب وئرمیردینیز. بلکه ده (آذربایجان یازارلار و شاعیرلر اوجاغی!!!)نین او قدر ایشی وارایمیش کی بیزه واخت یوخویموش. پس ائله دیسه نییه بو ایکی آیدا ناشیریز اولان پینارین تئلفونونا جاواب وئرمیردینیز. نه اولار کی آدام بیریندن نئچه میلیونلوق نسیه کیتاب دا گؤتورر!
کیشی ایکی ایل یاشماغین ساتیلمیش کیتابلارینین پولو سنده قالدی، قویوردون بیر ایل ده سنین ساتیلمایان کیتابلارین بیزیم آنباردا قالیردی! بیر ده کی هانسی دلی سنین قرنفیلینی آلیب یئرینه بختیار، رامیز، راسیم قاراجا، نیگار، آتیلا، علی جوادپور، کیان خیاو و تانری داریخیر وئرردی؟ اونسوز دا بو کیتابلارین بعضاً ایکینجی چاپی دا ایندی قورتاریبلار و هر کیمده اولسا بیر گونده قورتارار... بیر حالداکی سنین کیتابینی هامی قایتاریر و همن قایتاریلان کیتابلاری گئدیب پیناردان گؤتوره بیلرسن! بیر آزی دا اردبیلدن قاییدیب اونو دا آنبارا ییغمیشیق. بیر ده کی بونلارین پینارلا حساب کیتابینی سنه مئساژ ائتدیم و سن جاواب وئرمهدین، دئدیم بلکه قانع اولوبسان. و بیر ده کی بو گونلر (خرداد آیی) موغاندا بیر یاخین قوهومون یاسیندایدیم تزه گلمیشم و سنین مبارک اولان یازینی گؤرموشم.
سایین برادریم، سنین او قان دامان بوغلارووا، دابانین قاتلاییب سوروتمه ائلهدیگین باشماقلارووا قوربان، تهدید ائتمهیه یئر یوخدور، بیز چوخدان دؤیولموشلریک، بیزی پیچاقلاماق و دری بوغاز ائتمهیه ده گرهیی یوخدور، بو گونلر، بو عصرلرده او قدر قورخاغیق کی پیققق ائلهسن زهریمیز یاریلار، اوره ییمیز آغزیمیزدان گلر، قورخوتما بو قدر بیزی قاداسی...
سن و سندن بؤیوکلرین امر بویورسانیز بیز (یاشماغی دا، باشماغی دا، ...دا) تعطیل ائدریک. وورما حاجی وورما گؤزلریم قوربان کیتابلارینا، وورما یازمارام، وورما سئومهرم، وورما دانیشمارام، یاشماقسیز یاشاماماق دا اولار، یاشاماماق دا اولار. صابر بابامیز دئمیشکن: دوشونمهمک اولماز، دوشونورم آخی... وور دوشونورم آغا... سادهجه دوشونورم... و سئویرم، شاعیرین ایشی سئومکدیر...
یادیمدادی بویورموشدونوز بینابدان قوچو باشی گتیررسیز و یا هاردان نهچی... و یا هاراسا شکایتلر و گزارشلر ائدهجهیم... اوندا داها مختارسان سایین ادیبچی...
بیر دؤنه بیناب شعر انجمنینه قوناق اولموشام و اوردا گؤردویومه شاشقین قالدیم. نه قدر سئویملی و گوجلو گنج شاعیرلر وارایدی اوردا، هله ده او گؤرونتودن لذت آلیرام. تکجه بیر مسئله منی تعجبلندیریر، نییه بؤیوک شهرلرین و بؤیوک جمعین کیچیک نمایندهسی و ضعیفالنفس تمثیلچیسی اولور؟؟؟ بیر مسئلهنی اونوتماماق لازیمدی کی چؤرک داشدان چیخیر. و آدام داش تاپمایاندا، چؤرگی شاعیر ساتماقلا و دوست ساتماقلا چیخاردار. البته مستقیل شاعیره و یازیچییا داش آتماق دا واجیبدی. داشلاشماق بیر جوره چؤرک آغاجی اولوب تاریخ بویو. بیر گون بؤیوک و قوجامان بیر اوستاد و زمانهمیزین ددهقورقودو بویوردو کی «کاش آداملاری، اؤزللیکله یازیچیلاری و دوشونورلری بیر کئچی قیمتینه ساتمایالار...)
عرض ائلهدیم خدمت شریفینیزه، گلین هاردا دئسَز ایشلری یئر به یئر ائلهیک. من چوخدان سیزین حساب کیتابی پینار انتشاراتینین مدیرینه وئرمیشم، یا گئدین اونونلا حسابلاشین یا دا گلین بیرلیکده سیز دئین کیمی حلّ ائدهیین... وورمایین بیزلری، هله ده اوزوموزده شیلله یئرلری قیزاریر. اونسوز دا بیر اوزوموزه وورساز او بیری اوزوموزو توتاجاغیق محترم شیللهلرینیزین قارشیسینا. آخی بیز قورخاغیق..!
بو یایینلادیغیمیر آلتمیشا یاخین کیتاب و درگینی ده بیلمیرم نه جورأتله، هانسی قوردون اورهیینین کؤلگهسینده یایینلامیشیق. اصلینی دانیشساق بو کیتابلاری هانسی سیزین کیمی بؤیوک تاجرلرین پول-پاراسی ایله یایینلامیشیق. او اؤزو ده بیر چیخیلماز اتهام اولا بیلر!
شوخلوق و آجی طنزدن قیراغا بیر شئیی سیزه و سایین اوخوجولاریما و بلکه ده یئکه دانیشسام عمومی افکارا آچیقلامالییام. من حاجی شعبانعلینین اوغلو سعید موغانلی اوچ یئرده ایشلهییرم. صبحلر «بنیاد فلسفهی اسلامی» مرکزینده آراشدیرمالارلا بئکارلیغیمی سووشدورورام. گون اورتا واختی پیتزا رستورانی و یا دقیق دئسم (توکانیندا) پیتزا ساندویچ سیریییرام خالقا. البته دادلی پیتزالار بیشیریرم هاااا. وورغولاماسی پیس اولمازدی کی تهرانپارسدا ایکی پیتزا توکانیمیز وار. آخشام چاغیلار تبلیغاتی شرکتلرله تبلیغ ایشینه و اصلینده بؤیوک موسسهلرین چاپ اولوناجاق تبلیغ و رئکلام ایشلرینین مدیری و یا (ناظر فنی چاپ) باشچیسی کیمی باشیمی قاتیرام و هله آخشاملار واخت اولسا یاشماغا دا باش قوشوروق دوستلارلا..! بیر ده کی آتام اکینچیدیر موغاندا 50 -60 هکتار اکین یئرلریمیز وار، موغان دئییرم هااا، بیر موغان دئییرم، بیر موغان دا ائشیدیرسن..! چوخ دا سورگون بَیین پولو کیمی پوللارا احتیاجیم اولاندا آتامین تراکتورلارینی سورمهیی ده یاخشی باجاریرام. اکین اکمک، بیچین بیچمک بیر جورا شعردیر اصلینده... بیر ده یاشاسین قیرمیزی بوغدالاریمیز، ساری سونبوللو آرپالاریمیز... بیر ده کی من چوخدانین تراکتورچوسویام. قیرمیزی تراکتورا، تبریزلی او قیز کیمی عاشیغم. او قیزین آدینی چکسم، اتهاملاریمین بیری ده آرتار..! نه ایسه تراکتور دلیسییم ده. یاشاسین تراکتور. یاشاسین تراکتورچولار. یاشاسین اکینچی شاعیرلر...
اوسته گئدن مسئلهنی آچیقلاماقدا بونو دئمک ایستیردیم. فارس شاعیری سهراب سپهری دئمیشکن «روزگارم بد نیست، خرده هوشی دارم و سر سوزن ذوقی». دئمهلی یوز اللی مین تومن زورا باسدی تایپ پولو هله ده قویون جیبلریمده تاپیلا بیلر ظنّیمجه. قویون دئدیم رحمتلیک علی تبریزلینین (قیغلاشان قویونلاریمیز...) دئدییی، دردی یادیما دوشدو. آخی دردلی دئیینگن اولار...! هله پولدان دانیشاندا عزیز شاعیر رسول یونانین «بیز کاسیبیق، کاسیبلیق ائلهییریک دههه» یونان بَیین کاسیبلیغا گؤتوردویو معنی چوخ ماراقلیدی... اونو دئیهجکدیم کی سؤزون اوجون توتدوم اوجوزلوغا گئتدی، دَیرلی آفتاب آذربایجان نشریهسینده آچیقلادیغیم کیمی بو نئچه ایلده، اصلینده پیتزا ساتمیشام، کیتاب چیخارتمیشیق. و بو آرادا بوتون بؤیوکلریمیزه بورجوموز وار: علی تبریزلینین کیلاسلاریندان توتدو بیر نئچه سایین اوستادین حضوروندان توت گل یارپاق قزئتینده و دیلماج درگیسینده اؤیرندیییمیز و تجربه ائتدیییمیز بؤیوکلریمیزین امَگینه بورجلویوق. یاشماق دئدیین کؤرپه ایسه الیمیزده آغلار قالان بیر چالیشمانین سونوجودور. نه دردلی و زققو کیمی آجی ایمیش مدنی چالیشمالارین اومیدسیز سونوجو!!!
بیر ده بو مالی مسئله ایرهلی دوشموشکن آچیقلاماسی یئرینه دوشردی کی، نئچه ایلدی اونلارجا کیتاب ساتیش ائوینه کیتاب گؤندرمیشیک، بعضیلری دیلیمیزده اولان کیتابلارین ساتیش چوخلوغونون یورغونلوغوندان تعطیل ائلهمیشلر!!!، بعضیلری ندنسه ورشکست چیخمیشلار، بعضیلر ده (بیزیم کیمی) پول یئمیشلر خیرتدهیهجن، اونا گؤره ده آج سوسوز بَی بالاسی کیمی کئچینیرلر!!! آمما بعضی-بعضیلری جنابلاری؛ -اَشی سیز آللاه واریزسا بیزیم او کیتابلارین یئکهلرینین حسابلارینی ائلهیین دههه! نه اولار بیزه ده نَسه لازیم اولور آخی! بعضی دوستلارین کیتابینی وئرمیشیک سیزلره، سیز ده کی بیزی اونلاردان همیشه اوتانقاج ائلهییبسیز، اَشی انصاف دا یاخشی شئیدیر آخی...
بو دئیینگنلییی اونا گؤره یازدیغیم شخصین تایپ بورجونو اؤدهمک اوچون دئمیرم هاااا، جانیمیز چیخار اونو اؤزوموز اؤدهیهریک. ائله بئله سؤز آراسی گلدی دئدیم. ایکی–اوچ بؤیوک و عزیزیمیز اولان شاعیرین کیتابینی یایینلامیشیق هله بورجلارینی قایتارمامیشیق، هردن اوتانیریق. نه اینکی وئرمیریک و یا وئره بیلمیریک! یوخ اصلینده دئدیک قوی کیتاب ساتیلسین، و هر بیر اثر اؤزو اؤز خرجینی قایتارسین، او دا کی سونوندا بئله اولوب... بو عزیزلرین آدلارینی چکمکدن اوتانیرام، آمما بیر یئرده آچیقلایاندا کی بیر بئله کیتابلاری وئرمیشیک کیتابچیلارا هله بیر خبر یوخدور، تومروس یانا بیر خاتین دئدی کی «قوربان اولسون آذربایجانا... ادبیاتینا و...» او پول قاییتسا دا، خرجلهیین گنج شاعیرلرین اثرلرینه... آللاه ائل اوغوللارینی بو خالقا چوخ گؤرمهسین... آمین خاتین آمین...
اصلینده یازینین بوراسی، دای سورگونه جاواب اولارق یازیلمیر، دردلریمیز آچیلیبدیر! او قدر اومیدسیزلیکدن و قورخودان یازدیم، آخیرینی اومیدله سونا چاتدیرماق ایستیرم. استرس، قورخو، نگرانلیق و چتینلیک اولسا دا، گنج شاعیر باراز دئمیشکن: «هلم ده گؤزلرینین مهربان دادی وار...»
بیر عؤمور بویو هئچ بیر تهدیدلردن قورخمادیق، یاشادیق، یاراتدیق و سینه گردیک بوتون قولچوماقلارا، زندانلاردا دا یاشاتدیق بو سئوگینی!. آمما سیزدن نه گیزلین، سایین اوخوجو جان، یالان دانیشماغین یئری دئییل، بو گونلر بیر آز قورخوروق... بو گونلر بوتون یوخولاریم ایکی مئتراژلی یئرلرده کئچیر. هر گون بیر استرسلی ماجرا، هر گون اؤلومه بیر آددیم یاخین. هر گون بیر دهشتلی یوخو، بیر وحشتلی خیال. قارانقولوق خیاللار و قورخونج یوخولار محو ائتمکدهدیر منی... اوخوجو جان ال مندن اتک سندن...
سن سؤیله نئیلهمهلییک، بیر کامنت بیر اومید، بیر جیغیرا یول. بیر کامنت بیر دهشت، بیر سؤیوش، بیر کابوس... تکجه هله آنلامامیشام عایلهمیزین نه گوناهی وار بو ادبیات دوشرگهلرینده! بیر گون بوتون کامنتلری آزاد ائدهجهیم دوستاقلاریندان...
سن سؤیله اوخوجو بَی: بیر گون دئمیشدیم سؤیوشلرینیز ده نوش اولسون بیزه. آمما بو سون گونلرده منجیگَز اؤلوم رحم ائله واز کئچ یامان یووزلاردان!!!
قول-قاناد وئرمهیهجکسنسه، بادالاق آتیب سورونن آیاقلاریمیزی سیندیرما قاداسی.!
سنینله دئییلم قاداسین آلدیغیم اوخوجوم، سنین اومیدینله، ساده بیر گولومسهمهنله، پرپیلهمنله یاشاتدیق اؤزوموزو و سؤزوموزو. قادان گؤزلریمیزه دَیسین قاداسی... قادان میللتیمیزی ایستهمهینلرین اورهیینه دَیسین اوخوجو بایان و بَی جنابلاری...
نه گؤزل دئمیش شاعیر بابامیز:
قاتی کؤنلون نهدن بو ظلم ایله بیداده راغبدیر؟
گؤزللر سن کیمی اولماز، جفا سنده نه واجبدیر؟
سنین تک نازنینه، نازنین ایشلر مناسبدیر،
گؤزوم، جانیم، افندیم، سئودیییم، دولتلی سولطانیم...
او بیری اوخوجو ایله دردلهشیرم، یولداش دئییب بابکلری دوغرایان افشین آغا...
سن دئین دستور یئر به یئر اجرا اولوندو، بیز هر نهیی تعطیل ائلهریک سیز بویورساز!!!...
سن آلان دستورون آراسینا توک کئچمز قاداسی، توز قونماز پروردگارا...
هر نهیین بابالی بوینوزا، و عشق اولسون ادبیاتا، عشق اولسون شعره...
سایین نادیر دئمیشکن: یاشاسین بیزدن آرتیق داریخانلار...
الهم مغفرالمومنین والمومنات و المسلمین و المسلمات بحق کل اموات، بیز ده اونلارین ایچینده بوتون گئدنلرین روحو شاد و بحق سوره المبارکه الفاتحه مع الصلواه...
اتک یازی:
1. دوستوموزون اوسته گئدن یازیسیندا بولون-سولون املا و جمله یانلیشلیغی واردیر. بیلمیرم بو قدر قلط-قولوط یازی ایله بو قدر کیتابی نئجه و نه اوزنن حاضیرلامیشدیر. آمما بیر شئیی اونوتمایاق، آللاه کؤچور چیخاردانین کؤمهیی اولسون، هر کسی یازار ائلهییب، تؤکوب چؤله!!!
2. سهراب طاهر کیتابینین تایپیستی و یا کؤچورنی او دوستوموزدور، البته یئنه ده آللاه کؤچورچویه یاردیم اولسون... آدی گئدن کیتابین چاپ خرجی بیر میلیون ایکی یوز مین تومن اولموشدور کی اوچ یوزمین تومنین او آغا وئرمیشدیر کی دانیشیغیمیز اساسیندا، چاپدان سونرا اونا همن قدر ده کیتاب یوللانمیشدیر.
بیر ده کی سهراب طاهرین کیتابینین مولیفی سن دئییلسن! آستارالی سهراب طاهر آدلی، سنین شاگرلریندن بیریدیر!!! و سن اونون کؤچورله کؤچورنی و بیز سادهجه چاپا حاضیرلایانی کیمی یازیلمیشیق. بیر ده کؤچورمک ایشدیرسه منده بیر dvd وار کی، ایکی مینه یاخین کیتاب یئرلشمیشدیر. اونو گؤندریم ، اؤزون دئمیشکن سیاهینی اوزونات...
3. ایضاح ائتمک ماراقلی اولا بیلر کی 58 صحیفهلیک قرنفیل کیتابینین 12 صحیفهسی ده مجبوراً آغ واراق اولاراق گئتمیشدیر.
4. بو های-هشیر مسئلهسینی هر بیر اورتاق دوستلا آرادا قویماق ممکندور. بیر دوست بو مسئله ایله دریندن و جزئیاتی ایله تانیش اولماق ایستهسه، بو آچیقلاماغا واخت قویماق بیزیم اخلاقی بورجوموزدور. البته بو آرادا بیر ایکی بوش بئکار دوست آدلی کیمسهلر ده سویو بولاندیریب بالیق توتماق ایستیرلر. اللاه اونلاری دا هدایت ائلهسین.
5. تزهلیکده شاعیر دوستوموز بیر سیرا خالا باجی اویونو کیمی اویون اوینایان دوست بازلارا زنگ آچیب و بئش آلتی میلیوندان دانیشیرمیش. کیشی سنین گورون هاردایدی کفنین اولا!!! سنین کی کتابفروشی توکانینی بیز «حمیدله» نسیه کیتابلارلا دولدوردوق. یادیندا اولسا هئچ اولماسا اون انتشاراتدان سنه کیتاب آلدیق گؤندردیک. انصاف دا یاخشی شئیدی...
6. قاقاش سنین ایشین باشقا شئیدیر، گئت ایشینین دالینجا... یادیندادی کی ساده جه بیر پوستر (سهند) اوچون تهرانا گلمیشدین و نهایت اونو دا چاپ ائلهتدیره بیلمهدین. بو ایلین تقویمین ده حاضیرلامیشدین کی چاپ ائده بیلمهدین... او پولونو اوّلده آلدیغین موللانین کیتابینی دا کی پینار حاضیرلادی وئرده سنه. یادیندادی آز قالا آغلاییردین، من تابشیردیم ایشین حلّ اولدو... سایین آذربایجان یازارلار و شاعیرلر اوجاغینین صدری؛ اوخوجولارا زینک ایله فیلمین فرقینی دئیه بیلرسنمی؟؟! آذربایجان دیلینین سسلی و سسسیز حرفلرینی سایا بیلرسنمی؟؟! بیلیرسن قرامئر نهدیر؟ سندن یئکهلری نین سواللارینی جاوابسیز قویموشام. سندن یئکهلرینین تهدیدلرینه بیلخ گؤسترمیشم. کیشی گئت یئرآلمالارینی سات... کوچهلردن کؤهنه دمیرلری ییغیشدیر...
7. بیلمیرم سن نییه پینارین تئلفونلارینا جاواب وئرمیرسن؟! نه اولار بورجلو اولاندا، گؤتور دئنن هلهلیک یوخومدور، سونرا وئررم. او یازیق دا سنه کیتاب وئریب، پیس ایش گؤرمهییب کی! سن اونون و بیر سیرا بورجلو دوشدویون انتشاراتلارین کیتابلارینین پولو ایله بیر ایکی ایل عایله دولاندیریبسان آخی!!! یادیندادی تهراندا آپاردیم بیر نئچه ناشیرین یانینا و اونلارا یالواردیم کی سنه بیر آز چوخ تخفیف وئرسینلر. و سن ده گل ها گی هرهدن بئش آلتی کیتابچا گؤتوردون، بیر حالداکی بینابدان باسا-باسا دوروب گلمیشدین کی یامان کیتاب ساتیلیر! یادیندادی بیر نئچه کیتابچی تحقیرله گولدو و من اونلارا دوشوندوردوم کی تزه کتابفروشی آچیب هله یولا سالا بیلمهییب، و انقلابدا بیر بؤیوک ناشیر دئدی کی : «با این سلیقه و با این خرید این دوستتون در طول یکی دو سال یه وَری میشه و ورشکست خواهد شد». کیشی آغزیندا قیزیل کیمی سؤز دئمیشمیش...
8. هله دوغرودان به منیم تئلفونلاریما و مئساژلاریما نییه جاواب وئرمیردین؟ نمایشگاهدا دئمیشدیم کی بیر ایکی آیدان سونرا حساب نومرهنی مئساژ ائت ایلک نوبهده تایپ پولونو گؤندریم. دئدیم گؤندرمهدین. تئلفونوما جاواب وئرمهدین؟؟؟ یاواش-یاواش اینانمالییام کی گؤردویون ایشلر قاباقجادان طراحی اولونموشدور. هر حالدا بوتون حساب کیتابی پینارا وئردیم، گئت حسابلاش... البته بو سؤزو دؤنهلرله دئمیشم بیلمیرم نییه اؤزونو ووروبسان او یولا...
9. سورگون بهرام یازیر: (آذربايجان يازيچيلار و شاعيرلر اوجاغينين طرفيندن سهنده بير اؤزل ساي حاضيرلاندي. خواهيشمنديك او نشريه صاحيبلريندن كي بو اؤزل سايي ياييملانديرماقيندان چكيليب يالنيز اؤزلرينده بير آرشيو كيمي ساخلاماغا علاقه لي ديلر يالنيز آرشيولرينده ساخلاسينلار و اونون مطاليبين وئب واسيطه لريله يايملانديرماسينلار.)
بو مفهومسوز و غلط قولوط ایله دولوب داشان یازی بیزه گؤره یازیلمیشسا، قوللوغونوزا چاتدیرمالییق کی بیز سهنده اؤتن ایللرده بیر اؤزل سایی، سایین اوستاد دمیرچی ایله یایینلادیق. و اوندان سونرا بیزه هئچ بیر یازی سهنده گؤره وئریلمهمیشدیر!!!
10. سون سؤز بو اولسون کی؛ سؤزو گئدن شاعیرین بیر صفحهلیک یازیسیندا 31 املا و جمله قورولوشو غلطلری وار! بیلمیرم دوستوموز او قدر کیتابی نئجه حاضیرلاییب، او یازی بو ادعایا سیغیشمیر جانیم. اؤز کیتابیندا دا غلط یوخسا، یاشماغین جانی ساغ اولسون...
۱۱. اصلینده بو یازی شوخلوق ایدی، هئچ کیم اوره یینه آلماسین. یاری جدی یاری ظارافات...
والسلام علی من التبع الهدی
http://www.yashmaq.blogfa.com
|
