توتوشور فیرتینالاردان کئچمیش اللریم ؛ یاریق لاریندا هله سیلینمه میش بیر ایستی ایزدن ، اییرمی بیر ینجی یوز ایللییک ده دوستاق فاجیعه سی . سینیخمیش سینیرلریمله اؤتورم شه هه رین یانیق ائوجیک لرینین سؤنوکن گونوزلویوندن . آدیم هئچ یاندا تانینمامیش و کیتابلاریم هئچ یاندا یاییلمامیش . من واراممی یوخیکن اینانجیم چیلپاق ساحیل لره و یؤنوم دوشمزسه قوزئی لره اسن قاسیرغالارلا اوست – اوسته . یوخ ! بو منم ؛ قابیغی هؤرومجک توروندان اینجه کؤپوک .

بیر آن دا بئله ... بیلمه دیم و بیلمیرم نییه گئجیکیرم یاتاغیما هر گئجه و نییه تئزدن اویانیرام هر سحر . دوشمه دن بیلمه دییم یؤنو گونش سیز یول لارین آرخاسیزلیغینا ، آرخا یالنیز سنین تپَر وئریجی بؤیوک اینانج لاردان دوغان دونیا گؤروشون اولدو . بیلیردیلر کاش گؤزلریندن اؤتر و گزه گن لرین یوخوسونا دولان رسم اثرلرین چوخ جانلی وارلیق دان نئجه داها جانلی داها اوستون دور و من او رسم لرین بویالاریندا اوینار گؤزللیک لرینله هارالارا کیمی بؤیوموشم !

 دایانمازسان بیلیرم ؛سن آخی حیاتلاری بویلو ائده جک آرازلار کیمی داییما آخماداسان و من پئشینه دوشمورم قاراداش کیمی یاتاغیندا باتیرکن ! صاباح دئییل لاپ ایندی دن بیز یاشاییریق گؤز قاماشدیریجی ایشیقلارین الوان رقص لرینی و موزیک زاللارینین آنجاق پیانو سیندیرا بیله جک سوکوتلارینی و آخشاما بئله اومودو اولمایان او مکتب سیز قیزجیغازین تیترک آرزولارینین زاواللی دؤیونتولرینی ! داها بو دمیر لر ، توستولر و یالانلار بوغازیمی ، نفسیمی و اومیدیمی کسیر آدیم هئچ یاندا تانینمامیش ...

 

http://www.yenilik.blogfa.com/

نوشتن دیدگاه

نظراتی که حاوی مطالب خلاف نظام ، شئونات اجتماعی ، توهین یا افترا به کسی می باشند، منتشر نخواهند شد.
لطفا از نوشتن نظرات خود به صورت حروف لاتین (فینگلیش) خودداری نمایید.
برای تماس با شما لطفا ایمیل خود را بدرستی وارد کنین تا با شما اگر لازم باشد در تماس باشیم .


تصویر امنیتی
تصویر امنیتی جدید